നബിദിന മഹാ സമ്മേളനം സമാപിച്ചു

ത്രിക്കരിപ്പൂര്: കഴിഞ്ഞ ഒരാഴ്ചയായി ത്രിക്കരിപ്പൂര് മുനവ്വിറുല് ഇസ്ലാം മദ്രസ്സയില് നടന്ന് വന്നിരുന്ന നബിദിന മഹാ സമ്മേളനം ഇന്നലെ സമാപിച്ചു. മഗ്രിബ് നമസ്കാരനന്തരം സയ്യിദ് അലവി തങ്ങളുടെ പ്രാര്ഥനയോടെ ആരംഭിച്ച പൊതു സമ്മേളനത്തില് സയ്യിദ് അന്വര് തങ്ങള് അല് ബുഖാരി അദ്ധ്യക്ഷനായിരുന്നു. ശൈഖുനാ മാണിയൂര് അഹമ്മദ് മൌലവി സമ്മേളനം ഉദ്ഘാടനം ചെയ്തു. തുടര്ന്ന് സമസ്ത, അഫ്സലുല് ഉലമാ എന്നീ പരീക്ഷകളില് ഉയര്ന്ന മാര്ക്ക് വാങ്ങിയവര്ക്കുള്ള വിവിധ കമ്മിറ്റികളുടെ കാഷ് അവാര്ഡ് വിതരണം എന്.കെ.പി. മുഹമ്മദ് കുഞ്ഞി (അബൂദാബി), സലാം തട്ടാനിച്ചേരി ( സെക്രട്ടറി, ദുബൈ-ത്രിക്കരിപ്പൂര് മുസ്ലിം ജമാഅത്ത്), എന്.പി.മുഹമ്മദ് റഫീഖ്, മുഹമ്മദ് നൌഫല് എം.ടി.പി (ഖത്തര് - മുനവ്വിറുല് ഇസ്ലാം ശാഖാ കമ്മിറ്റി), ശിഹാബ് എന്നിവര് വിതരണം ചെയ്തു. തുടര്ന്ന് നടന്ന സ്വലാത്ത് മജ്ലിസിനും കൂട്ടു പ്രാര്ത്ഥനക്കും കോഴിക്കോട് ഖാളി സയ്യിദ് മുഹമ്മദ് കോയ ജമലുല്ലൈലി നേതൃത്വം നല്കി. ചടങ്ങില് വെച്ച് അബ്ദുള്ള ബാഖവിയുടെ ബുറാഖ് എന്ന പുസ്തകത്തിന്റെ പ്രകാശനം മുനവ്വിര് മദ്രസ്സ കമ്മിറ്റി ട്രഷറര് സി.കെ. സൈദ് ഹാജിക്ക് നല്കി ജമലുല്ലൈലി തങ്ങള് നിര്വ്വഹിച്ചു. ചടങ്ങില് മാണിയൂര് അബ്ദുള്ള ബാഖവി, ഉസ്മാന് അഹമ്മദ് മൌലവി, ടി.കെ. അബ്ദുള് ജലീല് ഹാജി, അഹമ്മദ് ബഷീര് ഫൈസി അല് അസ്ഹരി, എ.ജി. സിദ്ധീഖ്, എന്.എ. മജീദ്, എന്നിവര് സംബന്ധിച്ചു.